نتيجة الاعدادى .. ورجوع للماضى

اولا كده وقبل اى كلام

سمعونى اغنية الناجح يرفع ايدو

والساقط نقطع ايدو هههههههههه

احساس غريب اوى عيشته النهارده
اول ما ظهرت نتيجة الشهاده الاعدادية
وطبعا بحكم ان انا عندى سيبر لازم اكون
متابع
اكل عيش بقا يا جماعة
المهم
طبعا زى العاده النت كان زى الزفت
ومفيش اى موقع راضى يفتح من كتر الزحمة
طبعا مصر كلها مورهاش حاجه غير النتيجة النهارده
بس الحمد لله بعد عناء شديد فتح معايا موقع مديرية التربية والتعليم
وده بفضل بنت عمى قوس قزح الى وشها حلو عليا دايما
مش عايز اقولكم الناس كانت على اعصابها ازاى
الكل قاعد مستنى نتيجة تعب السنة كلها
وبحكم ان المنطقة عندنا السيبرات فيها قليلة
فطبعا كان فى ناس كتير عندى
وانا بتفرج على منظر الناس
افتكرت ايام الاعدادى بتاعتى
وامى وهى مستنية النتيجة بفارغ الصبر وعنيها اللى كانت مليانة بالدموع المحبوسة
دموع مستنية تخرج فى اى لحظة
بس ياترى اللحظة هتكون حزن ام فرح
ماعلينا من الحكاوى دى
ظهرت النتيجة وبدأت اشوف شغلى
اول نتيجة والحمد لله مجموعها كان 252 طبعا مجموع كبير جدا
انما رد فعل ابو الواد كان غريب اوى قال ايه زعلان
ويقولى ازاى ده انا ابنى فى مدرسة لغات وبدفع دم قلبى
وانا طبعا كان هاين عليا اقوم اموته ، فعلا الانسان مش بيملى عينه غير التراب
المهم مشى هو وابنه اللهى يحرقهم بجاز
وتوالت النتايج نتيجة تلو الاخرى وناس تزغرط وناس تعيط وناس بتاخدها عادى
وانا بقا موصفلكومش منظرى قاعد وسط فيلم عربى وفيلم ابيض واسود
واحد ينجح ويجيب مجموع الاقيه بايسنى على اساس انى موزه بقا
والى يتنيل ويسقط يروح راميلى كلمتين زى الفل فاكر ان انا الى بصحح الورق
اغرب حاجه بقا حصلت
واحده بنت جبتلها النتيجة انما اية نتيجة زى العسل
البنت شايلة 3 مواد غير المجموع كمان 131 يعنى بايظة من كله
الغريب بقا رد فعل البنت وامها
البنت ايزى خالص وامها زيها وجملة واحده الى قالوها
بقولها معلش يا امى تتعوض
تقولى معلش على اية عادى تمتحن تانى وتدخل بفلوسها مدرسة ثانوى
اومال المدارس الخاصة بتعمل ايه
الجملة دى فكرتنى بواحد كده زمان طبعا انتو عارفين ده مين احم احم مش انا
افتكرت علطول نفسى فى ايام الاعدادى
قولت نفس الكلام مع ان امى كانت منهارة
بس انا كنت زى البنت دى واخدها ايزى جدا جدا جدا
وقولت كبيرى ثانوى خاص
وهو فعلا ده اللى حصل بعد المجموع الكبير اللى انا جيبته
المهم فى الحكاوى الى انا بحكيها من الصبح دى وواجع دماغكم بيها
الشعور الى انا حاسه و اول مره اجربه
كل نتيجة كنت بجيبها كنت ببقا على اعصابى فيها زى اهلهم
بس بجد ربنا يكون فى عون الاهالى بجد حرقة دم وتعب
والعيال عادى ولا حد حاطت فى دماغو حاجه
بجد حسيت باحساس غريب وجديد عليا
احساس بالندم ندمى على انى خيبت امل امى وضيعت تعبها معايا على الفاضى
ندمى على احلام كنت بحلمها وكانت ممكن تتحقق لو اجتهدت شوية فى دراستى
وندم وندم وندم على حاجات تانية كتير افتكرتها انهارده
افتكرتها وانا شايف وجوه اهالى الطلبة والاختلاف بين كل وجه والاخر
اختلاف من الحزن والفرح
فى ختام كلامى بقول لكل طالب نجح وفرح اهلو الف الف مليون مبروك
والى مش نجح بقولو انسى الى فات وركز فى الى جى وحاول تجتهد شوية
علشان ميجيش يوم وتلاقى نفسك ندمان على حاجه كانت فى ايدك